يالأخو وين الجفين

يالأخو وين الﭽفين *** و العلم طايح في وين
يفداك عمري يفداك *** شنهو صار دونك عباس

رميت صبري بمصرعك *** طول نهار ..
لﮕيت جسمك و الﮕللب *** ظل محتار ..
أموت و بعيني الزمن *** دار     و    دار    ..
و أريد و أسأل منذهل *** شلي صار ..

حنون مثلك ما شِفِت *** و إحنا صغار
عذوب ﮔللبك *** بالوِفا و الإيثار
و أشوف وضعك *** عالنهر يالمغوار
تعوف خيَك *** مِنفرِد بين أشرار

ذَبَحني فﮕدك *** ياخويه ظليت وحيد
أنا الي بعدك *** عليه الجروح تزيد
ياريت يردك *** ونيني لو حسرة يفيد
حياتي عِندك *** يبو الفضل و إنته بعيد

ما تِشِد جرحك و تﮕوم ..

شِمتَت على حسين الﮕوم ..

مكسور ظَهري بفرﮔاك ..

شنهو صار دونك عباس ..

يالأخو وين الﭽفين *** و العلم طايح في وين
يفداك عمري يفداك *** شنهو صار دونك عباس

شﮕول لو جونك رِحِت *** يا بو الجود ..
شِفِت الأطفال ذبِلَت *** مِثل ورود ..
و حرام تبﭽي و الخيم *** ﭼنها رعود ..
و أظل سِكنة تِنتِظر *** مني ردود ..

تصيح صبرو *** و هسى بس عمي يعود
أبد عمي *** غالي ما ينسى وعود
ياحيف لو تدري الﮕمر *** ظل ممدود
على الشاطي و الغِسِل *** دم الزنود

يخيب أملها *** في كربلاء تنسى الماي
إذا وصلها *** خبر رحيل السقاي
تنوح و مالها *** يخويه بعدك حماي
يهم عللها *** تِظِل تحن ذاب حشاي

تندبك و الدمعة تسيل ..

و المنايا عليه تميل ..

لِلموت خذني وَيَاك ..

شنهو صار دونك عباس ..

يالأخو وين الﭽفين *** و العلم طايح في وين
يفداك عمري يفداك *** شنهو صار دونك عباس

يا من لجله للحشر *** لو ظليت ..
أنوح و أجري دموعي دَم *** ما وفيت ..
عليك عتب إختك صِدِﮒ *** عنها مشيت ..
تﮕول جيتِ لكربلاء *** وياكم جيت ..

لجلكم عِفت الوطن *** عِفت البيت
و أشوف عني سافَرِت *** و تخليت
تروح و آني بذمتك *** ما ظنيت
أحِن و أنشِد يالأخو *** ما حنيت

على الوَطية *** تظل يا كافل الضعون
طول الدَعية *** خواتَك اللي يروحون
على المطية *** بلا كفيل يصعدون
مِن الأذية *** و من الهضيمة يونون

نسوة تتستر بالإيد ..

و إنته نايم عنها بعيد ..

تنخاك زينب تنخاك ..

شنهو صار دونك عباس ..

يالأخو وين الﭽفين *** و العلم طايح في وين
يفداك عمري يفداك *** شنهو صار دونك عباس